ក្រុមហ៊ុន Alibaba បានសម្រេច​ទិញយក​សារព័ត៌មាន​ដ៏​មាន​ឥទ្ធិពល​នៅ​ហុងកុង South China Morning Post កាលពី​សប្តាហ៍​មុន ក្នុង​គោលបំណង​ប្រកួតប្រជែង​ជាមួយ​ប្រព័ន្ធ​ផ្សព្វផ្សាយ​លោកខាងលិច​ដែល​លម្អៀង និង​ជួយ​កែ​មុខមាត់​មហា​យក្ស​ចិន​នៅលើ​ឆាក​អន្តរជាតិ​។ ម្ចាស់​ក្រុមហ៊ុន លោក Jack Ma បាន​អះអាង​រឿង​ទិញ​ស្ថាប័ន​ព័ត៌មាន​នេះ​គ្មាន​ពាក់ព័ន្ធ​រដ្ឋាភិបាល​ក្រុង​ ប៉េកាំង​ទេ​។​

​ជា​រឿង​គួរ​ឲ្យ​ភ្ងា​ក់​ផ្អើល នៅពេលដែល​ក្រុមហ៊ុន Alibaba របស់លោក Jack Ma បានសម្រេច​ជោគជ័យ​ក្នុង​ការទិញ​ស្ថាប័ន​ព័ត៌មាន South China Morning Post ដ៏​មាន​ឥទ្ធិពល​និង បោះ​ពុ​ម្ភ​ផ្សាយ​ជា​ភាសា​អង់គ្លេស​នៅ​តំបន់​ហុងកុង​។ សារព័ត៌មាន South China Morning នេះ​ត្រូវបានគេទទួលស្គាល់​ដោយសារ​ការផ្សព្វផ្សាយ​រឿង​រសើបៗ​ផ្នែ​កនយោបាយ និង​បញ្ហា​សិទ្ធិមនុស្ស ដែល​សុទ្ធសឹងតែ​ជា​សំណុំរឿង​ដែល​សារព័ត៌មាន​ចិន​ឯទៀត​មិន​ហ៊ាន​ផ្សាយ​។​ ក្រុមហ៊ុន Alibaba បាន​ចំណាយ​ពេលវេលា​ច្រើន​ខែ​ដើម្បី​ចរចា​សុំ​ទិញ​ស្ថាប័ន​សារព័ត៌មាន​មួយ​នេះ ហើយ​ចុងក្រោយ​ក៏បាន​សម្រេច​បំណង​ខ្លួន​មែន​។ 
 

​បំណង​ធំ​បំផុត​នៃ​ការ​ឈានទៅ​ទិញ​ស្ថាប័ន​ផ្សព្វផ្សាយ​នេះ គឺ​ដើម្បី​លើកមុខ​មាត់​មហា​យក្ស​ចិន​ដែល​កំពុង​រះ​ត្រដែត​ឡើង​នៅលើ​ឆាក​ អន្តរជាតិ ប៉ុន្តែ​ត្រូវ​ប្រព័ន្ធ​ផ្សព្វផ្សាយ​លោកខាងលិច​ធ្វើ​ឲ្យ​ខូច​កេរ្តិ៍ឈ្មោះ​ ដោយ​និន្នាការ​មិន​អព្យា​ក្រឹត្យ​របស់គេ​។​
 

​ក្រុមហ៊ុន Alibaba បាន​អះអាងថា គោលបំណង​នៃ​ការទិញ​ស្ថាប័ន​ព័ត៌មាន​គឹ​ដោយសារតែ​ប្រព័ន្ធ​ផ្សព្វផ្សាយ​ លោកខាងលិច​លម្អៀង​ពេក ហើយ​ការ​ទិញយក​ប្រព័ន្ធ​ផ្សព្វផ្សាយ​នេះ​នឹង​ជួយ​លើក​មុខមាត់​ប្រទេស​ចិន និង​ជួយ​ផ្សព្វផ្សាយ​រឿង​វិជ្ជមាន​ពី​ប្រទេស​ចិន​ថែមទៀត​។​
 

«​ជំនួញ​យើង​ដែលមាន​មូលដ្ឋានគ្រឹះ​នៅក្នុង​ប្រទេស​ចិន និង មាន​ទំនាក់​ទំនងជា​មួយផ្នែក​ជាច្រើន​នៃ​សេដ្ឋកិច្ច​ចិន ដែល​នៅពេល​មនុស្ស​មិន​យល់​ពី​ចិន ហើយ​មាន​ទស្សន​អវិជ្ជមាន​ចំពោះ​ចិន ពួកគេ​ក៏​ដូច​យល់​ខុសពី​ក្រុមហ៊ុន Alibaba ដូចគ្នា​»​។ នេះ​ជាស​ម្តី​របស់​អគ្គនាយក​រង​ក្រុមហ៊ុន Alibaba លោក Joseph C. Tsai​។ 
 

​យ៉ាងណាមិញ កិច្ចព្រមព្រៀង​ទិញ​ប្រព័ន្ធ​ផ្សព្វផ្សាយ​របស់​ក្រុមហ៊ុន​ឯកជន Alibaba បានធ្វើ​ឲ្យ​មាន​មនុស្ស​ជាច្រើន​រិះគន់​។ គេ​បារម្ភ​ថា ក្រុមហ៊ុន​ឯកជន​ដែល​នឹង​គ្រប់គ្រង​សារព័ត៌មាន​ដ៏​មាន​ឥទ្ធិពល​នេះ វា​អាច​នឹងធ្វើ​ឲ្យ​ប៉ះពាល់​ដល់​ដំណើរការ​ស្ថាប័ន ដូចជា​អ​ព្យា​ក្រឹត្យ  និង​សេរីភាព​បញ្ចេញមតិ​ថែមទៀត​។ គេ​បារម្ភ​ព្រោះតែ​និន្នាការ​ទោរទន់​របស់​ក្រុមហ៊ុន​ឯកជន​នេះ​ទៅរក​របប​ ដឹកនាំ​ក្រុង​ប៉េកាំង​។​
 

​ប៉ុន្តែ​ឆ្លើយតប​ការបារម្ភ​នេះ ក្រុមហ៊ុន Alibaba  បាន​អះអាងថា ខ្លួន​គ្មាន​ផែនការ​ជ្រៀតជ្រែក​កិច្ចការ​របស់​អ្នកសារព័ត៌មាន​ទេ ហើយ​ក្រុមហ៊ុន​ក៏​មិន​ដាក់​ការត្រួតពិនិត្យ​ការនិពន្ធ​មុនពេល​បោះពុម្ពផ្សាយឡើយ​។ ដែល​នេះ​មានន័យថា សុ​ច្ចរិតភាព និង ឯករាជ្យ​នៃ​ស្ថាប័ន​ផ្សព្វផ្សាយ​នៅតែ​អាច​រក្សាបាន ៕

 

ប្រភព៖ thmeythmey